Hvað með fordæmi Breta?

Hvað með að setja frekar reglur um innihaldslýsingu á vörum?  Fyrirtæki geta troðið transfitum undir sama hatt og fitur almennt.  Í Bretlandi þarf að aðgreina þessa transfitur frá öðrum fitum, auk þess sem litir gefa til kynna með einföldum hætti hvort magn transfitu í vöru sé óæskilega hátt (rautt), í meðallagi (gult) eða lítið eða ekkert (grænt).  Einföld leið fyrir neytendur að velja og hafna.  Þetta myndu þrýsta á fyrirtæki til þess að fara aðrar leiðir og losa sig við transfitu eða minnka magn hennar í matvælum (ef neytendur almennt vilja losna við hana).  Þetta ásamt auglýsingum í fjölmiðlum (frá Lýðheilsustöð til dæmis) um transfitur ætti að vera nóg til að gefa neytendum valdið.  (Það þarf líka kenna fólki að meðhöndla matvæli rétt og elda hann þannig að sem minnst af transfitum verði til, það gleymist stundum).

Almennt eru svona bönn einfaldlega ekki sniðug, fræðsla og greiður aðgangur að upplýsingum er oftast betri leið.

 

A pinch too much - The Economist

Vilja norrænt bann við transfitusýrum

Athugasemdir

[dvergur, 30.10.2008 kl. 08:44]

Ekki það að maður vilji eitthvað endilega feta sömu slóðir og bretar, þá get ég tekið undir það að upplýsingar eru betri en bönn.

Það á ekki endalaust að hugsa fyrir fólk og banna allt sem gæti hugsanlega verið óhollt. 

[hestur (IP-tala skráð) 30.10.2008 kl. 17:23]

Það þarf nú líka að hugsa um heilsu þeirra sem hugsa ekki um eigin heilsu.

Við nennum heldur ekki öll að standa í 10 mínútur við pulsurekkann að velja pulsur m.t.t. verðs, transfitumagns, fitumagns og... þó það virki kanski í orði þá velur kaupir fólk bara SS eða hvað hendi er næst, lítur í besta falli á verðmiðann.

Hvað svo með veitingastaði og hamborgarabúllur? Við förum nú varla að velja hamborgarann með sem fæstum transfitueiningum, það bara gengur ekki.

[Zaraþústra, 31.10.2008 kl. 20:02]

Ef ég er gáfaðari og meðvitaðri en þú, væri þér alveg sama þótt ég tæki ákvarðanir fyrir þína hönd þegar ég held ég viti betur?  Mér þykir það afar óábyrgt viðhorf.

Annars held ég að þú gerir þér ekki alveg grein fyrir áhrifum þess sem ég er að leggja til.  Í Bretlandi hafa veitingahúsakeðjur tekið þær ákvarðanir að hætta að selja matvæli með transfitum í án afskipta ríkisins.  Ástæðan er einfaldlega sú að þegar neytendur hætta að kaupa vörur sem innihalda transfitur sér ekkert fyrirtæki hag í því að framleiða þær og veitingahúsin þurfa vitaskuld að kaupa inn matvælin frá þessum fyrirtækjum eins og aðrir.  Auk þess verður fólk meðvitaðra um hvar það verslar, ef veitingastaður auglýsir transfitulausan mat er fólk líklegra til að fara þangað ef það er meðvitað um hættur þess að borða transfitur.

Þessi leið er líka gáfulegri að mínu viti vegna þess að danska-leiðin kemur ekki í veg fyrir að transfitur verði til við matseld.  Danir banna bara transfitur í matvörum, en þeir banna ekki þær eldunaraðferðir sem geta myndað transfitur.  Þannig að þú getur vel farið á veitingahús í Danmörku og fengið mat sem inniheldur transfitur.

[hestur (IP-tala skráð) 2.11.2008 kl. 06:37]

Ég veit ekki neitt um transfitusýrur. Ef að ÞÚ veist hinsvegar að þær séu stranglega óhollar í öllum tilfellum, væri þá ekki ráð að koma þeirri þekkingu á réttan stað á skjótan hátt?

Jú, bönnum þetta bara. Og frelsum þar með mig og alla hina sem vita ekki: unglingsstelpur, elliheimilalíð, fatlaða, börn óupplýstra foreldra og fólk sem hugsar ekki út í svona hluti.

Ef þú villt svo upplýsa neytandann um skaðsemi þessa og hins, þá er það allt í lagi, einhverjir hlusta, einhverjir muna og einhverjir fylgja svo boðskapnum. En ég held almennt séð sé hugmyndin um upplýsta neytandann tálsýn og að farsælast sé alltaf að reyna að búa til eins einföld dæmi og hægt er fyrir neitendur.

Þá þurfa þeir ekki að vera mjög greindir og þurfa ekki að eyða sínum tíma í að kynna sér hluti endalaust.

[Zaraþústra, 19.1.2009 kl. 00:22]

Ef hestur getur fundið einhvern sjálfráða einstakling hér á landi, sem veit ekki að sígarettur eru skaðlegar, þá skal ég með glöðu geði samþykkja að það sé ekki hægt að gera það að almennri þekkingu að eitthvað sé óhollt.